• A-
  • A
  • A+
сабота, 22 септември 2018, 

Форум за демократска Македонија: Владата сеопфатно да се бори со корупцијата

Скопје, 10 август 2018 

Форумот за демократска Македонија, заедница на иселеници од #Македонија, го искажува своето незадоволство од подготвеноста на институциите на системот да се ангажираат во борба против корупцијата и злоупотребата на моќ.

Најновиот случај на злоупотреба на службена положба и овластување од страна на директорот на Бирото за јавна безбедност, покажа дека речиси по рефлекс и како по навика тенденциите на обиди за закривање или извртување на одговорноста продолжуваат.

Под притисок на јавноста се случи барањето за разрешување на директорот на Бирото за јавна безбедност. Иако позитивен исчекор, ова е далеку од доволно за одлучна борба против корупцијата, бидејќи се сведува на политичка, а исклучува дисциплинска и кривична #одговорност.

Наместо државните институции да ги спречат или детектираат пропустите, таа улога и натаму ја презема јавноста со секојдневно лоцирање на неправилностите како што е случајот со тендерите или пак доделувањето средства од разните фондови. Последен пример е случајот со субвенциите за иновации.

Сето ова укажува дека механизмите за спречување и откривање на #корупција во државната администрација се или несоодветни или не се спроведуваат доследно.

За жал, и ветените системски решенија и реформите во правосудството доцнат. Владата мора сеопфатно да се бори со корупцијата, а не само преку поништени тендери и разрешувања. Овој пристап праќа порака за висока исплатливост и мала веројатност за одговорност.

#ФДМ кој произлезе од граѓанските движења меѓу иселениците, кои се бореа за владеење на правото, исто како и овие движења се залага за промена, а не за замена.

Скандалите поврзани со сомневањата за корупција и злоупотреба на службената положба се повеќе го нагризуваат кредибилитетот на Владата и довербата во нејзините реформски капацитети. Како што од граѓаните се очекува болен компромис заради евроатлантската интеграција и отворање на перспективите за развој на државата, така и политичките елити, а пред се власта, треба непоколебливо да покажат европско поведение преку одлучни #реформи и активности за нулта толеранција на корупцијата.

#ПоинакваДијаспора

Форумот за демократска Македонија

___________________________________________________________

МИА овие текстови ги објавува во интегрална и оригинална форма и не е одговорна за нивната содржина, ниту за евентуалните правописни недоследности или печатни грешки.

Сите права се задржани. Овој материјал не смее да се складира, издава, емитува, препишува и повторно да се дистрибуира во каква било форма, без писмена дозвола од Македонската информативна агенција.



НЕМА ПОВРЗАНИ ВЕСТИ