• A-
  • A
  • A+
петок, 21 септември 2018, 

Нова пречистителна станица за третман на отпадни води во Кичево

Нова пречистителна станица за третман на отпадни води во Кичево

Кичево, 20 јуни 2018 (МИА) - Општина Кичево доби нова пречистителна станица за третман на отпадни води изградена со европски пари, со што трајно се решава проблемот со отпадните води во општината и се подигнуваат стандардите за заштита на животната средина. Пречистителната станица, која е сместена во близина на Кичево, е со инсталиран капацитет за 48.000 жители. Реализацијата на проектот вклучува и изградба на колектор и пристапен пат.

Проектот за изградба на пречистителната станица за отпадни води во Кичево е финансиран од Европската унија преку Инструментот за претпристапна помош (ИПА), од делот за регионален развој – компонента три. Вкупната вредност на Пречистителната станица за отпадни води во Кичево изнесува 8,3 милиони евра. Македонија за да биде комплетно покриена со пречистителни станици, треба да бидат направени вкупно 87, а ова е 16 успешен проект во рамките на ИПА.

На означувањето на почетокот на работата на станицата за третман на отпадни води во Кичево вицепремиерот за економски прашања Кочо Анѓушев истакна дека секогаш е добро кога нешто се прави соодветно на ЕУ стандардите.

- ЕУ не носи само желба за Македонија да биде дел од тоа семејство, туку со себе носи и стандарди за квалитетот на животот граѓаните, на индустријата и на секојдневието. Со оваа донација од Европската унија и нејзините граѓани, ние имаме уште поголема обврска да достигнеме повисоки стандарди, критериуми и квалитет на живот на нашите граѓани. Проектот значи голем исчекор во заштита на животната средина во регионот и со примена на ова иновативно решение стандардите на европскиот живот се пренесени тука, изјави вицепремиерот.


На отворањето обраќање имаше шефот на Делегацијата на Европската унија, амбасадорот Самуел Жбогар кој посочи дека проектот е дел од активностите финансирани од ЕУ за унапредување на инфраструктурата која овозможува заштита на животната средина согласно стандардите на ЕУ преку изградба на пречистителни станици за отпадни води.

- Паралелно со инвестициите во инфраструктурата, ЕУ исто така работи заедно со државата на реформи во секторот води, со цел да се обезбедат одржливи услуги за водоснабдување на сите граѓани, истакна Жбогар.

Реализацијата на проектот е во соработка со Секторот за ЕУ при Министерството за животна средина и просторно планирање и Секторот за централно финансирање и склучување на договори при Министерството за финансии.

Министерот за животна средина и просторно планирање Садула Дураки, го потенцираше значењето на проектот за заштита на животната средина и воедно најави дека успешната реализација на овој проект е предуслов за реализирање на уште поголем проект за општина Кичево во рамките на ИПА 2 кој предвидува рехабилитација и изградба на нова канализациска мрежа во должина од приближно 100 километри.

Градоначалникот на општина Кичево Фатмир Дехари рече дека пречистителната станица ќе биде од огромно значење за жителите од овој крај, како и за подобрувањето на квалитетот на животот.

- Работиме посветено на решавање на отворените прашања во општината, со цел да ги подобриме состојбите и да го поттикнеме локалниот економски развој. Во овој процес заштитата на животната средина е од големо значење, па оттука поддршката од централната власт и особено од ЕУ е од огромно значење, на што сме многу благодарни, истакна  Дехари. 

Изградбата на Пречистителната станица за отпадни води во Кичево ја реализираше компанијата WTE Group, која е во сопственост на ЕВН Групацијата. WTE Group е водечка компанија за снабдување со вода и третман на отпадни води на пазарот во ЕУ, присутна во 18 европски земји со проекти од оваа област.

- Огромно задоволство за нас претставува можноста да работиме на изградба на Пречистителна станица за отпадни води, бидејќи третманот на водите денес станува едно од најважните прашања. Горди сме што како лидери во Европа во овој сегмент имавме можност да го пренесеме нашето знаење и искуство. Овој објект е изграден по највисоките стандарди и искрено се надеваме дека ќе имаме можност и понатаму да соработуваме, истакна Вернер Казагранде, член на Извршниот одбор на WTE Group.

Пречистителната станица во Кичево е изградена за помалку од две години и е втора што е пуштена во употреба во рамки на проектот. Првата пречистителна станица беше пуштена во употреба кон крајот на минатата година, а лоцирана е во село Сачево, Струмица. Се очекува наскоро да биде пуштена во употреба и третата пречистителна станица која се наоѓа во Радовиш. Вкупната вредност на овие објекти изнесува 21 милион евра.рз/вј/15:26

###

 

 

Сите права се задржани. Овој материјал не смее да се складира, издава, емитува, препишува и повторно да се дистрибуира во каква било форма, без писмена дозвола од Македонската информативна агенција.



НЕМА ПОВРЗАНИ ВЕСТИ