• A-
  • A
  • A+
вторник, 18 септември 2018, 

Штетите милионски, стопанствениците бараат Косово да ја повлече одлуката

Штетите милионски, стопанствениците бараат Косово да ја повлече одлуката

Скопје, 24 јули 2018 (МИА) - Македонските стопанственици бараат укинување на косовската одлука со која се зголемија царините за извоз на овошјето и зеленчукот. Сметаат дека ќе нанесе огромна штета врз економијата, а и сега, велат, во овие неколку дена, штетите достигнаа околу три милиони евра.

Според Сојузот на стопанските комори (ССК), ваквата одлука на Косово е внатрешно-политичка и не соодветствува на потребите на пазарот. Стопанската комора на Северозападна  Македонија (СКСЗМ), пак, апелира што поскоро да се најде решение, но не е за воведување контра мерки. 

- Одлуката на Косово е неосновано донесена и е спротивна на ЦЕФТА Договорот. Апелираме проблемот што поскоро да се реши, без одолговлекување, зашто секој изминат ден значи штета што не може да се надомести,  изјави извршниот директор на ССК, Александар Зарков.

И нивните колеги-стопанственици од Косово, вели, се затечени од ваквиот потег на Владата на Косово. 

- Сметаме дека ваквата одлука може да се одрази негативно врз севкупната размена меѓу Косово и Македонија, бидејќи се губат сигурноста и довербата за трговија и за почитување на воспоставените договори. Веруваме дека  владите ќе го решат овој неочекуван проблем што поскоро, напомена Зарков. 

Извршниот директор на СКСЗМ, Дрилон Исени смета дека од воведувањето на мерката што стапи во сила на 18 јули досега штетите од нереализираниот извоз се околу 3 милиони евра. Затоа, порача,  министрите од регионот на утрешниот состанок да изнајдат решение за надминување на овој проблем. 

- Одлуката на Косово е непопуларна и сметаме дека треба да се преиспита, но сме против воведување контра мерки зашто тоа ќе и наштети на целата економија, изјави Исени. 

Министерот за земјоделство Љупчо Николовски попладнево на прес-конференција во Владата информира дека е во тек седница на Владата на Косово на која се очекува мерката за зголемување на царините да се преиспита. Николовски, како што рече, лично смета дека во следните неколку часа може да се очекуваат нови моменти од косовска страна.мч/са/15:02

###

 

Сите права се задржани. Овој материјал не смее да се складира, издава, емитува, препишува и повторно да се дистрибуира во каква било форма, без писмена дозвола од Македонската информативна агенција.



НЕМА ПОВРЗАНИ ВЕСТИ