Манчевски за „27 април“: Добивавме закани дека ќе бидеме убиени

Манчевски за „27 април“: Добивавме закани дека ќе бидеме убиени

Скопје, 31 август 2018 (МИА) - Сите 33 обвинети за случувањата на 27 април во Собранието на Република Македонија се присутни на денешното рочиште во Кривичниот суд во Скопје, на кое треба да бидат сослушани четворица сведоци предложени од Обвинителството.

Денешното рочиште почна со сослушување на сведокот Дамјан Манчевски, а треба да сведочат и Фросина Ременски, Павле Богоевски и Илија Николовски.

Манчевски рече дека на 27 април бил во прес-салата на Собранието заедно со Зоран Заев и други пратеници и оти кога толпата влегла во прес-центарот забележал човек со црна маица и ознаки на „хос“ кој носел оружје.

- Толпата ја проби вратата. Поголема група луѓе се упати кон нас и почна да мава со раце, стативи за камера, столици, тастатури и се што најдоа пред себе, како и со стапови од знамиња што ги носеа со себе. Видов лице со оружје. Тоа носеше црна маица со ознаки на хос без коса и со брада во тој момент, рече Манчевски.

Манчевски

Во неколку наврати, појасни Манчевски, можев да видам дека лицето посегнува по задниот дел од пантолоните и во рацете го држи оружјето.

- Никогаш не го извади во целост, но постојано додека траеше настанот добивавме закани дека ќе бидеме убиени, што мене лично ми ја покажува намерата на целата група, сведочеше Манчевски, додавајќи дека човекот со оружје ни бил толку активен како останатите, но оти цело време бил фокусиран со погледот кон Заев.

Рече дека имал впечаток оти и други лица носат оружје, но оти не видел друго лице со оружје.

Манчевски сведочеше дека постојано добивале закани по живот и дека ќе ги убијат оти ја продале државата и дека се предавници.

Пред судот Манчевски кажа дека добил удар со бокс во пределот на носот и оти носот му бил скршен. Постојано добивал шамари и удари со статив од камера и чадор којшто потоа го откупил од лицето што го удирало за 1.000 денари.

- Откако Зијадин Села падна и ја прославија победата, толпата почна да прави јажиња од каблите од опремата за да не бесат, рече Манчевски.

Кажа дека никој од собраниското обезбедување не се обидел да ги однесе на побезбедно место додека траел настанот.

Собрание тепачки Заев

Прашан како се однесувало собраниското обезбедување, Манчевски кажа дека чул како  шефот на собраниското обезбедување телефонски се обидува да добие некој, но потоа неговиот коментар бил „оставени сме сами".

Обвинетите во случајот за настаните од 27 април се теретат за терористичко загрозување на уставниот поредок. Тие на претходното рочиште во Кривичниот суд кажаа дека го разбираат обвинението, но не се чувствуваат за виновни. 

Судскиот процес започна на 22 август со воведни говори на обвинителката Вилма Рускоска и адвокатите на обвинетите.

Обвинителката Русковска во воведниот говор истакна дека има докази со кои ќе ги потврди наводите од обвинението за сторено кривично дело терористичко загрозување на уставниот поредок, а одбраната тврди дека не постојат докази кои укажуваат на тоа.

На обвинителната клупа се Љубен Арнаудов, Сашо Василевски, Крсто Мукоски, Љупчо Димовски, Јохан Тарчуловски, Митко Чавков, Митко Пешовски, Душко Лазаров, Горан Јошевски-Леви, Оливер Поповски, Оливер Радулов, Сашко Марковски, Мунир Пепиќ, Абдуљфета Алими, Елена Доцевска-Божиновска, Иван Цветановски, Борис Дамовски, Богдан Илиевски-Бетмен, Владо Јовановски, Игор Дурловски, Стефан Младеновски, Михаил Младеновски, Захарие Симовски, Младен Додевски, Јане Ченто, Горанче Ангеловски, Игор Југ, Илија Славески, Влатко Трајков, Вилијам Михајловски, Никола Митревски-Кољо, Александар Василевски-Нинџа и Митре Питроповски. аа/бак/11:33

###

Сите права се задржани. Овој материјал не смее да се складира, издава, емитува, препишува и повторно да се дистрибуира во каква било форма, без писмена дозвола од Македонската информативна агенција.



НЕМА ПОВРЗАНИ ВЕСТИ

Мозаик

„Хет трик“: Фудбалер за само шест недели доби деца од три жени

Напаѓачот на англискиот фудбалски клуб Стоук Сити,...

Доделена „Алтернативната Нобелова награда"

Наградата „Правилно живеење", позната и како „Алте...

Тревога во Бакингемската палата поради приврзок за клучеви

Мажот кој вчера беше уапсен кај Бакингемската пала...

Многу мажи по сексот чувствуваат емотивна празнина

Дури 40 отсто од мажите по сексот чувствуваат емот...

НАСА откри две нови планети

Само пет месеци по поставувањето во земјината орби...