Бошкоски во „Тортура“: Апсењето кај Воденица е настан што сакам да го избришам од мојата меморија

Бошкоски во „Тортура“: Апсењето кај Воденица е настан што сакам да го избришам од мојата меморија

Скопје, 3 септември 2018 (МИА) – Мене ми е многу жал што се случи таков настан, настан што сакам да го избришам од мојата меморија, но еве со денешново судење ми се враќа како нова епизода од мојот живот.

Ова го рече оштетениот Љубе Бошкоски на денешното рочиште во Кривичниот суд, на кое се сослушува во својство на сведок.

Тортура

Одговарајќи на прашање од обвинителот на СЈО Љубомир Лапе, Бошкоски рече дека на 6 јуни 2011 година, ден по изборите, бил повикан од негов пријател во ресторанот „Воденица“ за да решат должничко-доверителски односи што ги имале од претходно. Кога го завршил разговорот со тоа лице, кого, како што рече Бошкоски, го сметал за пријаел, со него носел кеса со пари што не ги броел, иако биле изложени пред него, излегол и тргнал кон автомобилот на паркингот.

- Само што излегов слушнав како некој вика стој полиција. Некои од полицајците носеа капи фантомки. Почнаа да викаат легнете го ѓубрето и во еден момент ме легнаа на асфалтот како најголем криминалец, рече Бошкоски.

Додаде дека при апсењето не давал отпор. Од полицајците слушнал дека ова му е поздрав од шефот и дека не му бегаат седум-осум години затвор.

Бошкоски, како што рече, тогаш рекол „знам дека ме намести твојот шеф Саша. Некој рече да не се спомнува името Саша, туку шеф, издигнувајќи го како библиска личност, затоа што во Библијата стои „не го споменува залудно Бога“, рече Бошкоски.

Тој оцени дека апсењето било политички реваншизам што произлегол од неговите јавни настапи по напуштањето на партијата ВМРО-ДПМНЕ и формирањето на Обединети за Македонија.

Бошкоски рече дека ќе бара обвинетите кривично да одговараат, а за оштетното побарување ќе каже во текот на постапката.

На денешното рочиште на „Тортура“ се присутни првоосомничениот Сашо Мијалков и останатите обвинети во овој случај. дма/сд/11:10

###

Сите права се задржани. Овој материјал не смее да се складира, издава, емитува, препишува и повторно да се дистрибуира во каква било форма, без писмена дозвола од Македонската информативна агенција.



НЕМА ПОВРЗАНИ ВЕСТИ