• A-
  • A
  • A+
четврток, 20 септември 2018, 

Граѓанска кампања за референдумот „Зачекори напред! Изборот е твој“ (видео)

Граѓанска кампања за референдумот „Зачекори напред! Изборот е твој“ (видео)

Скопје, 10 септември 2018 (МИА) - Десетина граѓански организации денеска ја почнаа кампањата „Зачекори напред! Изборот е твој“, со која на граѓаните во наредните три недели преку серија јавни и медиумски активности ќе се обидат да им ги доближат Европската Унија и нејзините политики, како и да одговорат на голем бро прашања поврзани со тоа што треба да направи Македонија на патот кон ЕУ и НАТО и што ќе добие со евроатлантската интеграција.

- Граѓанските организации што се дел од оваа иницијатива сметаат дека во овој клучен момент за државата многу е важно граѓанското општество да се вклучи и да дејствува активно во текот на процесот, со цел на грѓаните да им обезбеди колку што е можно повеќе информации за тоа што значи пристапувањето на Република Македонија во ЕУ, што значи членството во НАТО, а воедно колку што е можно повеќе да го доближиме и самиот договор меѓу Македонија и Грција, вели Фани Каранфилова Пановска, извршна директорка на Фондацијата Отворено општество - Македонија.

 Еурека 2

Посочи оти целта на кампањата е и да се обезбедат информации за сите аспекти од референдумското прашање, при што изрази надеж дека на 30 септември огромен број македонски граѓани ќе излезат да го искористат своето право на глас.

Извршниот директор на Евротинк - центар за европски стратегии, Љупчо Петковски, рече дека кампањата ќе опфати повеќе аспекти од влезот во ЕУ што ќе се одразат на секојдневниот живот на граѓаните, како квалитетот на лековите, квалитетот на производите, одложувањето на сметот, чистотата на водата...

- Одлучивме во кампањата да примениме вакви „приземни“ информации, кои на граѓаните ќе им овозможат да донесат информирана одлука. Во демократијата е многу битно граѓаните информирани да носат одлуки. Соочени сме со историски момент, каде што е важно како граѓани да го оствариме нашето демократско право,  а тоа да е базирано брз добри информации, кои се вистинити и кои на граѓаните ќе им објаснат кои се придобивките од целиот овој процес што ќе го почнеме во наредните години, рече Петковски.

Лилјана Јоноски, извршна директорка на Руралната коалиција - Куманово, посочи дека земјоделците имаат голем удел во процесот на донесување одлуки и целта на кампањата е до нив да се допре со точни и јасни информации, односно што ќе значи за еден земјоделец влезот во заедничкиот пазар од половина милијарда луѓе. 

Граѓанските организации дел од оваа кампања изработија опсежни анализи од повеќе области, кои можат да се најдат на интернет-страницата www.zacekorinapred.mk.

Еурека 3

Во рамките на кампањата ќе бидат објавени и две изданија на весникот „ЕУрека“, кој ќе биде бесплатен и ќе биде достапен на најфреквентните места низ државава. Првиот број е објавен денеска, а вториот ќе биде објавен на 22 септември.

Кампањата ќе се одвива на национално ниво и ќе содржи различни аудиовизуелни материјали - ТВ-спотови, анимации, фотофакти..., кои ќе се објавуваат на телевизиите, радиостаниците, социјалните мрежи, а ќе бидат поставени и билборди. Истовремено ќе се организираат низа медиумски и јавни дебати, директни средби со граѓаните, промоции на книги... нд/са/13:55

###

 

 

 

 

 

Сите права се задржани. Овој материјал не смее да се складира, издава, емитува, препишува и повторно да се дистрибуира во каква било форма, без писмена дозвола од Македонската информативна агенција.



НЕМА ПОВРЗАНИ ВЕСТИ