Случајот Скрипал ја подели светската јавност

Случајот Скрипал ја подели светската јавност

Пекинг, 13 март 2018 (МИА) - Во изјавата на британската премиерка Тереза Меј за наводната улога на Москва во труењето на поранешниот руски шпион Сергеј Скрипал и неговата ќерка недостасуваат сериозни докази, изјави денеска портпаролот на кинеското Министерство за надворешни работи Лу Канг.

- Се наеваме дека дотичната страна ќе се потпре на реални факти врз основа на кои ќе се дискутира за ова прашање и како тоа ќе се решава, рече Лу.

Според него, Кина внимателно го следи случајот Скрипал.

Британскиот министер за надворешни работи Борис Џонсон претходно денеска изјави дека е охрабрен со „волјата на пријателите“ да покажат поддршка и солидарност по труењето на рускиот шпион Сергеј Скрипал.

 

Британската премиерка Тереза Меј  вчера во британскиот Парламент изјави дека е „многу веројатно“ дека Русија е одговорна за труењето со нервен агенс на Скрипал и неговата ќерка. Меј нагласи дека Британија во врска со тој случај е подготвена да преземе далеку посеризони мерки кон Русија отколку порано.

- Голема е веројатноста дека Русија е вмешана во труењето на Скрипал бидејќи е утврдено дека супстанцата е од Русија, нагласи Меј.

Русија потоа оцени дека изјавата на Меј е политички мотивирана и се базира на провокација.

- Тоа е циркуско шоу во британскиот Парламент. Заклучокот е очигледен: ова е повторно информативно-политичка кампања базирана на провокација, изјави портпаролката на руското Министерство за надворешни работи Марија Захарова.

Потпретседателот на Европската комисија Валдис Домбровскис денеска изјави дека Европската унија ќе биде со Велика Британија откако Лондон соопшти дека најверојатно Москва стои зад труењето со нервен агенс на поранешниот руски шпион Сергеј Скрипал во Англија.

- Многу сме загрижени за ситуацијата како и од неодамнешните резултати од истрагата на Велика Британија, рече Домбровскис.

Американскиот Стејт департмент ито така претходно издаде соопштение, во кое истакна дека САД во целост веруваат во истрагата и проценката на Обединетото Кралство дека најверојатно Русија е одговорна за нападот со нервен гас на Скрипал.

Американскиот државен секретар Рекс Тилерсон претходно изјави дека труењето на поранешниот шпион Сергеј Скрипал во Велика Британија „јасно доаѓа од Русија“ и оти „сигурно ќе предизвика одговор“, но не прецизираше каков.

Тој рече дека не знае дали руската Влада знаела за труењето, но оти отровот не можел да потекне од ниту едно друго место.

Портпаролот на Кремљ Дмитриј Песков вчера изјави дека труењето на поранешниот руски двоен агент Сергеј Скрипал во Велика Британија не е прашање за руската Влада.

- Споменатиот руски државјанин работел за една од специјалните служби на Велика Британија, тоа се случило на територија на Велика Британија и на никаков начин не е прашање за Руската Федерација, односно раководството на Руската Федерација, рече портпаролот на рускиот претседател Владимир Путин.

Песков истакна и дека не слушнал за обвинувањата на британските политичари за можна вмешаност на Русија во овој напад.

Поранешниот резервен полковник на руското воено разузнавање кој бил врбуван за британското разузнавање МИ6, поради што во 2010 година е осуден за предавство, Сергеј Скрипал и неговата 33-годишна ќерка Јулија од минатата недела се во болница во критична состојба, откако се пронајдени без свест на клупа во градот Солсбери, на југот од Англија. јт/ми/12:56

###

 

Сите права се задржани. Овој материјал не смее да се складира, издава, емитува, препишува и повторно да се дистрибуира во каква било форма, без писмена дозвола од Македонската информативна агенција.