Царовска се обрати на 107. Конференција на МОТ во Женева

 Царовска се обрати на 107. Конференција на МОТ во Женева

Скопје, 6 јули 2018 (МИА) - Министерката за труд и социјална политика Мила Царовска, учествува на 107. конференција на Меѓународната организација на трудот, која се оддржува во Женева, на тема „Градење на иднина со пристојна работа”.

Учесници на настанот се околу 4.000 делегати од целиот свет кои разговараат за приоритетите и потребите во областа на трудот.

- Владата на Република Македонија е целосно посветена на напредувањето на заштитата на работниците и нивните права. Реализирајќи го овој приоритет, во текот на изминатата година беа донесени повеќе законски решенија што направија исчекор во оваа област, како што се измените во Законот за работните односи и во Законот за минимална плата. Со ова се унапредија условите за заштита на младите и на работниците во случај на престанок на работниот однос од деловни причини и се зголеми минималната плата, која е сега еднаква за сите сектори, се вели во соопштението од Министерството за труд и социјална политика.

Министерката Царовска предводи трипартитна делегација, со претставници на Владата и репрезентативните синдикати ССМ, КСС и организацијата на работодавачи ОРМ.

За време на работната посета Царовска одржа состанок со федералниот директор на МОТ Гај Рајдер. Исто така, оствари билатерални средби со холандскиот министер за социјални работи и вработување и хрватскиот министер за труд и пензиски систем, како и со Петер Погачар, државниот секретар на Министерството за труд, семејство, социјални работи и еднакви можности на Словенија. На средбите се разговараше за видовите договори за работа и мерки за унапредување на условите во областа на трудот. сст/сд/15:46

###

 

Сите права се задржани. Овој материјал не смее да се складира, издава, емитува, препишува и повторно да се дистрибуира во каква било форма, без писмена дозвола од Македонската информативна агенција.



НЕМА ПОВРЗАНИ ВЕСТИ